أطباق رئيسيه طيور

وصفات طهى الدجاج و الطيور 

- كوردن بلو 

فيليه صدور دجاج حنشتريه سليم ومخلي ونشيل الذيادات (القطع الصفيرة اللي خارجة 

من الصدر ) ونحاول نخليه مش طخين اوي ولكن ينفع يتفتح اتنين ونفتحه بس مش 

للاخر كانه سندويتش زي الصورة-جبنة شرايح -لحم مفروم مستوي (عادة بيتحط لحم 

لسان مدخن )لكن بالمفروم اسهل ومتناول في البيت

بيض وبقسماط وزيت للقلي

حناخد الشريحة نوزع فيها شريحة الجبنة ونحط معاها المفروم 

ونقفلها بخلة اسنان ونعصر عليها مية بصل وملح وفلفل ونحطها في 

البيض ثم البقسماط

وتقلي في زيت غزير علي نار متوسطة علشان تستوي من جوة 

ونقلبها للجنب التاني

ونقلهم علي ورق مطبخ

وتقدم بالف صحة وعافية

***************************

تشيكن بيكاتا 

صدور فراخ مخليه ومقطعة زي البفتيك -دقيق كمية قليلة-كوب صغير 

كريمة-مشروم

نتبل الفيليه بالملح والفلفل ونحطه في الدقيق

نقليه في كمية زيت قليلة ونخلي النار متوسطة علشان نضمن 

السوا

ننشل الفيليه ونحطه في طبق ونقلي المشروم في نفس الطاسة 

وبعدين نرجع الفيليه تاني

ونضيف الكريمة ونقلب ونسيبه يغلي بيها ونطفي النار علي طول

ويقدم بالف هنا وشفا

*************************************

حواوشى الفراخ 

نص كيلو فراخ مفرومة -جزرة مبشورة-فلفلة خضرا مقطعة-فص توم 

كبير او فصين صغيرين-ملح وفلفل-بهارات مشكلة-بصلة صغيرة 

مبشورة

نقلب كل المكونات ماعدا الفراخ في ملعقتين زيت علي النار لحد 

لما يدبلوا فقط

نضيف عليهم حبة طماطم مقطعة ونقلبهم ونسيبهم دقيقتين 

ونطفي

بعد لما تبرد الخلطة نضيفها للفراخ المفرومة ونقلبهم كويس باليد 

مش بالملعقة علشان نحس بتجانس المكونات

نحضر الخبز ونقطعه نصين ونحشيه بجزء كافي من الخلطة ونفردها 

فيه 

وممكن نعمله رغيف سليم ونفتح جزء منه للحشو

نلف كل سندويتش في فويل لحد لما نخلص الكمية

نرصهم في صينية وندخلها الفرن نار متوسطة لمدة حوالي نص 

ساعة او اقل شوية

بالف هنا وشفا 

صنف سريع وجديد ولذيذ (من ابتكاري ) اتمني يعجبكم

***********************************

صدور الرومى بالفستق 

نحضر صدر الديك الرومي وناخد منه الكتله الجانبية المتماسكة زي 

الصورة ونشيل الزيادة بعض الناس بيسموها (الموزة)

نحضر التتبيلة :بصلة مبشورة وملح وفلفل -فصين توم مدقوقين 

خفيف -2ورقة لوري-ملعقة كبيرة دبس -ملعقة كبيرة فستق

قبل اي عمل حنربط الصدر عشوائي زي الروزبيف

نتبله بعصير البصل والملح والفلفل والدبس ونعمل ببوز السكينة 

فتحات رفيعة بس غويطة لجوة في اماكن مختلفة

نجيب ورق الومنيوم مدهون خفيف زيت ونلفها ونقفلها كويس

نحطها في حلة كبيرة ومعاها كوب مية كبير وفصين التوم وورق 

اللوري ونغطي الحلة ونغليها علي النار مدة حوالي ربع ساعة

بعد الربع ساعة حنشيل ورق الالومنيوم ونحطها في صينية ومعاها 

باقي مية السليق وندخلها الفرن مدة تلت ساعة او اكتر حسب 

حجم اللحم

هنا بعد لما طلعت من الفرن استني تبردواشيل الخيط وتقطع 

ترنشات

تقطع ترنشات وتقدم بالف صحة وعافية

عملنا صنف من اغلي اصناف الحفلات وبدون تكاليف باهظة

******************************

فراخ مشويه بدبس الرمان

التتبيلة بصلة مبشورة-ملح وفلفل -نص ملعقة كبيرة سماق

2ملعقة كبيرة دبس رمان 

نناخد نص الدبس ونخلطه علي باقي التتبيلة ونتبل الفرخة ونسيبها 

في التتبيلة علي الاقل 3ساعات

ندخلها الفرن علي نار فوق المتوسطة لحد لما تستوي 50 في 

المية

نطلعها من الفرن وندهنها بباقي الدبس اللي محضرينه وندخلها 

الفرن لغاية لما تكمل السوا بس مش نبعد عنها علشان الدبس 

مايتحرقش علي جلد الفرخة

ودي خطوة مهمة هي اللي بتظر مزازة الدبس في الفراخ وتديها 

الطعم الخطير

وهنا مع البطاطس الودجز

وهنا من قريب وواضح اللون

ان شاء الله تعجبكم

****************************************************